匿埋3個月失聲厭食 84磅林欣彤:我食緊藥

Face 28/11/2012 第288期

匿埋3個月失聲厭食

84磅林欣彤:我食緊藥

兩年前選完《超級巨聲2》後，小巨肺林欣彤(Mag)簽約英皇，又出碟又拍戲，聲勢大好。直至今年中，22歲Mag發現喉嚨生繭，即時停工休養。

靠把靚聲搵食的Mag，自喉嚨生繭之後，再發現鼻膜出現問題，莫講話唱歌，連講說話都冇力。一心諗住放假養病，點知鬱到變情緒病，要睇心理醫生，據知林欣彤更出現厭食，由高峰期115磅的肥妹仔急跌至84磅。全面停工的她上週出席Eric Kwok(郭偉亮)婚禮時，被問到失蹤近3個月，她氣弱柔絲話:「我食緊藥!」

林欣彤身體一向麻麻，喉嚨生繭後，又發現鼻膜發炎，雖然已即時戎掉所有煎炸和刺激食物，但之前出碟拍戲日日捱夜，病情時好時壞，喉嚨不時劇痛，始終未能斷尾。

急瘦30磅

眼見事業起飛，但有病難醫的林欣彤擔心手停口停，搞到晚晚失眠。

知情人士說：「其實祖兒介紹咗個針灸灸醫畀Mag，喉嚨已經好番少少，但上兩個月又輪到個鼻，阿Mag真係崩潰，成日無啦啦喊，又食唔到嘢，身邊啲朋友覺得佢係心理作用，佢又唔敢食，驚食錯嘢。其實咁樣仲衰，搞搞吓開始有輕微厭食，瘦咗成30磅呀!」

上週五(23日)，匿埋3個月的Mag終於出關，出席Eric Kwok(郭偉亮)和葉佩雯的婚禮，瘦剩84磅的Mag，除了塊面尖哂外，更現胸骨。本刊問她點解暴瘦，Mag冇晒氣力細聲話: 「我食緊藥……抗生素加類固醇，搞到有啲副作用，食唔到嘢!(係唔係有情緒病?)心情麻麻……遲吓會好架喇，畀多少少時間我休息。」

一月先復工

婚禮未散席，匿埋多月的Mag先行離開，單拖搭的士到大圍曉翠山莊。據知，這幾個月，Mag要靠身邊的好友共渡難關，除了男友羅孝勇，還有許廷鏗和一班舊同學，輪流日夜班開解她。

本來，年尾是歌手搵錢的好時機，據知今年Mag亦接了不少聖誕和倒數show，但狀態未回，試過月初有個戶外騷演出，她亦要臨時缺席，Mag最少要抖多2個月，到明年1月才有限度復工。

Mag參加《超級巨聲2》時與有錢仔羅孝勇撻著，早前被踢爆同居何文田山，Mag一病接一病，這幾個月真係患難見真情。

姑勿論阿MAG係咪真係病到瘦晒，但係響網上不斷流傳緊話佢密密去香港醫學抗衰老中心，果間醫學美容中心之前喺TVB攞咗最強人氣微整形大獎架，唔知阿MAG離奇瘦面關唔關事呢呵？！